El nuesu colexu tuvo la suerte de ser ún de los centros escoyíos p'asistir al Día de les Ciencies Asturianes poro, el vienres 8 de payares, los escolinos del tercer ciclu, el director del cole y la maestra de Llingua colamos pal teatru de la LLaboral pa participar nun alcuentru con ún de los investigadores más destacáos nel mundu de la Bioloxía: el Dr. Carlos López- Otín.
Trátase d'un científicu d´altor , que trabaya na Universidá d'Uviéu y que desenvolvió estudios perimportantes al rodiu del temes como l'ADN o les célules que provoquen dellos tipos de tumores.
Baxo'l títulu de " Les aventures moleculares de la vida" el profesor diónos una clase maxistral na que faló dende l'orixen de los primeros organismos vivos hasta los avances caberos dientro la bioloxía, avances que van ser fundamentales pa la salú y bien de la humanidá.
Sicasí, esplicotíonos que tolo xenético moldéase y va camudando, y nesti cambiu tien muncho que ver l'ambiente, el mediu nel que se desarrolla la vida poro ye fundamental:
- La importancia que tien la llectura, hai que lleer y conversar más ente nós.
- Llevar una vida sana ya equilibrada.
- Mañana siempre ye tarde ,nun tengas priesa pero nun te detengas.
- El valor de la perseverancia.
- El valor de la solidaridá.
- L'esfuerzu ante l'adversidá.
Una vegada acabada la conferencia, y dempués de tomar l'aperitivu, esfrutemos d'una visita guiada pela Universidá de la Llaboral, averándonos un pocoñín más a la hestoria del edificiu más grande d'España y averándonos, como non podía ser d'otra miente, a la hestoria d'Asturies.
Equí vos dexo les semeyes de la visita. Espero que los neños y neñes sían conscientes de lo privilexiaos de contar nesti día con un científicu de tal consideranza, ¡a ver di dalgún vieno con ganes de siguir el so camín!
No hay comentarios:
Publicar un comentario